• Santalices Vieira traslada a Nuñez Feijóo o resultado da rolda de consultas mantida esta mañá cos representantes das forzas políticas parlamentarias
• O presidente do Parlamento comunica á Mesa e Xunta de Portavoces o calendario previsto para a investidura
Santiago, 28 de outubro de 2016.- O presidente do Parlamento de Galicia, Miguel Ángel Santalices Vieira, proporá a Alberto Núñez Feijóo como candidato á Presidencia da Xunta de Galicia no Pleno de investidura que se celebrará en datas próximas.
O presidente do Parlamento reuniuse esta mañá, por separado, cos portavoces dos catro grupos parlamentarios representados na Cámara galega, dando cumprimento ao artigo 136.1 do Regulamento da Cámara.
Rematada a rolda de consultas cos representantes dos grupos políticos, e oída a Mesa da Cámara, o presidente do Parlamento trasladou o resultado das conversas a Alberto Núñez Feijóo, que foi proposto candidato á Presidencia da Xunta de Galicia por ter asegurado o respaldo maioritario do Hemiciclo, cos votos dos 41 deputados do Grupo Parlamentario Popular.
Calendario
Paralelamente, o presidente do Parlamento comunicou á Mesa e Xunta de Portavoces o calendario previsto en relación coa investidura do presidente da Xunta de Galicia.
• Mércores, 2 novembro: Constitución das comisión
• Venres, 4 novembro: Mesa-Xunta de Portavoces, convocatoria Plenos investidura e apertura X Lexislatura
• Martes, 8 novembro: Pleno de investidura (exposición candidato)
• Xoves, 10 novembro: Debate e votación da investidura (transcorridas 48h - art. 136.3º e 5º RPG)
• Sábado, 12 de novembro: Toma de posesión (art. 19 Lei 1/1983)
• Martes, 15 de novembro: Sesión solemne de apertura da X Lexislatura
Este mesmo venres, constituiuse tamén a Xunta de Portavoces da X Lexislatura do Parlamento de Galicia, na que se formalizaron os trámites previos á constitución formal das comisións, prevista para o próximo mércores, 2 de novembro.
Saúdos, Gabinete de Comunicación do Parlamento de Galicia.
Parlamento de Galicia
