saltar ao contido

Santalices anima a mocidade a enriquecer a súa bagaxe persoal e profesional co cultivo da oratoria

Inauguración 02/03/2018

• O presidente da Cámara inaugurou o I Torneo Parlamentario, un certame de oratoria organizado polo Club de Debate Compostela no que participan equipos de Galicia, Barcelona, Salamanca e Madrid
 
Santiago, 2 de marzo de 2018.- O Parlamento de Galicia acolle durante as xornadas de hoxe e mañá a celebración do I Torneo Nacional de Debate Parlamentario Compostela, un certame de oratoria organizado polo Club de Debate Compostela no que participan equipos de Galicia, Barcelona, Salamanca e Madrid.
 
A actividade foi inaugurada esta mañá polo presidente do Parlamento de Galicia, Miguel Ángel Santalices Vieira, que deu a benvida aos participantes  e enmarcou a celebración do certame no Pazo do Hórreo na estratexia de apertura da Cámara á sociedade, “para que a cidadanía nos coñeza mellor e saiba o que aquí facemos”.
 
Como exemplos desa política de apertura, Santalices referiuse ás medidas encamiñadas a facilitar a participación cidadá na actividade parlamentaria; a potenciación das visitas guiadas; o programa Coñece as túas institucións que permitirá a alumnado de Primaria e ESO visitar as sedes do Parlamento e da Xunta; as charlas divulgativas para alumnado de ESO e Bacharelato, que neste curso se ampliaron tamén á universidade; ou a relación co mundo da cultura.
 
O presidente da Cámara explicou que a apertura da institución implica tamén unha maior presenza social do Parlamento e dos seus integrantes alí onde sexan requiridos.

Interese pola oratoria
 
Santalices Vieira felicitouse polo crecente interese que suscita actualmente a oratoria “despois dun certo decaemento” e animou á mocidade a cultivar estas habilidades, polas súas repercusións positivas nos ámbitos persoal e laboral.
 
Insistiu en que a oratoria debe tratar de convencer ao adversario, “nunca ferilo”.
 
O acto inaugural contou tamén coa participación de representantes dos grupos parlamentarios Popular, dos Socialistas de Galicia e do BNG.

Imaxes relacionadas

saltar ao pe de páxina