Acordos da Comisión 6.ª, Industria, Enerxía, Comercio e Turismo, celebrada o 21.04.2021

 

A Comisión 6ª, Industria, Enerxía, Comercio e Turismo, na súa sesión do 21 de abril de 2021, adoptou os seguintes acordos:

 

 

 

 

Sométese a votación e resulta aprobada sen modificacións por 10 votos a favor, 2 votos en contra e 0 abstencións.

 

O texto aprobado é o seguinte:

 

“O Parlamento de Galicia insta á Xunta de Galicia, a solicitar ao Goberno de España, que atenda as alegacións feitas pola Xunta de Galicia ao “Proxecto de orde polo que se establecen os prezos dos cargos do sistema eléctrico e dos pagos por capacidade que resultan de aplicación a partir do 1 de Xuño de 2021”, e que se se substancian en:

 

1. Ampliar o prazo de alegacións a este proxecto de orde para que os axentes interesados poidan analizalo en profundidade e formular alegacións con rigor, dada a importante incidencia que ten o seu articulado na economía das familias e na competitividade das empresas.

 

2. Ampliar o dereito de poder acollerse ao Prezo Voluntario ao Pequeno Consumidor (PVPC) ata potencias iguais ou inferiores a 15 kW para o consumidor doméstico.

 

3. Realizar estudos de facturación de enerxía eléctrica cos perfís de consumo habituais dos fogares e das empresas dos sectores industrial e servizos, para coñecer o impacto económico real dos novos cargos e peaxes na factura de electricidade como paso previo á aprobación dos cargos do sistema eléctrico que se realicen.

 

4. Có obxectivo de impulsar a eficiencia enerxética e o autoconsumo, solicítase que se conceda máis peso específico ao termo de enerxía que o de potencia.

 

5. Realizar con suficiente antelación a posta en marcha das novas tarifas, campañas informativas que axuden ao consumidor a facilitar a toma de decisións para facer un consumo máis eficiente”.

 

 

 

Sométese a votación a transacción coa emenda do G. P. Popular de Galicia doc. núm. 14536 e resulta aprobada pola unanimidade dos 12 deputados e deputadas presentes.

 

O texto aprobado, con modificacións respecto do texto orixinal, é o seguinte:

 

“O Parlamento de Galicia insta a Xunta de Galicia a recoñecer o carácter oficial da ruta xacobea coñecida como Camiño do Mar, que discorre polas vilas lucenses de Ribadeo, Barreiros, Foz, Burela, Cervo, Xove, Viveiro e O Vicedo e prosigue pola provincia da Coruña, vía Mañón, Cariño, Ortigueira, Cedeira, Valdoviño, Narón ata Neda, e o inclúa en todas as accións de promoción turística, divulgación e reactivación económica ligadas á celebración do ano Xacobeo 2021-2022.”

 

Sométese a votación a transacción coa emenda do G. P. Popular de Galicia doc. núm. 14535 e resulta aprobada pola unanimidade dos 12 deputados e deputadas presentes.

 

O texto aprobado, con modificacións respecto do texto orixinal, é o seguinte:

 

“O Parlamento galego insta á Xunta de Galicia a colaborar con Adif para levar e mellorar a conexión 5G no rural da nosa Comunidade Autónoma e, así mesmo, a solicitar do Goberno de España as seguintes actuacións:

 

1º-) Que o Administrador de Infraestruturas Ferroviarias (Adif) colabore co Goberno autonómico na execución de actuacións de mellora da cobertura de redes de fibra óptica e móbiles no territorio da Comunidade galega.

 

2º-) Realizar un mapa de infraestruturas susceptibles de ser usadas para o despregamento de redes de telecomunicacións, contando coa colaboración necesaria da Xunta de Galicia para o inventariado destas infraestruturas.

 

3º-) Definir e poñer en marcha mecanismos e/ou acordos de colaboración co operador público Retegal para o aproveitamento das súas infraestruturas existentes por parte operadores privados, así como, para a posta en marcha de actuacións complementarias.”