Santalices reivindica o papel determinante das vacinas ao longo da historia fronte aos “insensatos” que as rexeitan

 

Santiago, 15 de xuño de 2021.- O titular do Lexislativo galego, Miguel Ángel Santalices Vieira, clausurou esta tarde en Santiago o acto de presentación do libro “Pandemias. Las epidemias que asolaron la humanidad”, obra do profesor Juan Gestal Otero, catedrático emérito de Medicina Preventiva e Saúde Pública da USC.

 

Na súa intervención, Santalices Vieira, outrora alumno do profesor Gestal na Facultade de Medicina de Santiago, gabou os “inmensos coñecementos científicos, pero tamén a vocación didáctica, a calidade expositiva e a xenerosidade sen límites” do catedrático.

 

 

Sobre esta última cualidade, apuntou que o profesor Gestal Otero asesorou “gratis et amore” ao Parlamento de Galicia no deseño e implantación do Plan de continxencia da institución fronte á covid-19, un documento que suscitou reiterados eloxios polo seu rigor.

 

Para o presidente do Parlamento, o libro “Pandemias” é un exemplo “de todo o que acabo de dicir, na medida en que o profesor Gestal, desde o rigor que o caracteriza, comparte os seus coñececementos enciclopédicos co público en xeral”, facendo uso dun estilo ameno que o fai accesible para todas as persoas.

 

 

Santalices Vieira aproveitou a súa intervención para subliñar o “papel determinante das vacinas ao longo da historia”, feito que considerou necesario recordar “fronte ao insensatos que aínda a día hoxe lle dan credibilidade ás mensaxes dos antivacinas”.

 

Outra das conclusións do presidente do Parlamento á vista do contido deste libro reside no “papel histórico de Galicia”, moitas veces descoñecido, no ámbito da saúde pública, acadado a través da Expedición Filantrópica da Vacina que zarpou do porto da Coruña en 1803 para levar a vacina contra a varíola a América e, desde alí a outros asentamentos de ultramar. Nesa expedición, destacou o traballo de Isabel Zendal, galega de Ordes, á que a OMS recoñeceu como a primeira enfermeira da historia en misión internacional.

 

Xa para rematar, o presidente do Lexislativo galego remarcou a importancia do coñecemento científico, convencido de que “só a ciencia asegura o progreso e a superación das pandemias”.

 

 

Saúdos, Gabinete de Comunicación.