Parlamento de Galicia
Parlamento de Galicia
Santiago, 22 de setembro de 2023.- O presidente do Parlamento de Galicia, Miguel Ángel Santalices Vieira, participou esta tarde no primeiro encontro Alumni da Universidade de Santiago de Compostela, no que se deron cita antigos alumnos e alumnas da institución baixo o título “A universidade despois da universidade".
No acto, celebrado no Pazo de Fonseca, Santalices subliñou o “papel determinante" da universidade para o desenvolvemento de calquera sociedade, e particularmente para a galega.
“O avance rexistrado por Galicia no derradeiro medio século foi realmente espectacular", avance que o presidente do Parlamento autonómico atribuíu a tres factores. Referiuse, en primeiro lugar, á implantación da democracia e o posterior desenvolvemento da autonomía “que nos permitiu decidir por nós mesmos aspectos tan importantes como o ensino, a sanidade, ou as obras públicas", entre outros.
Paralelamente, o ingreso na Unión Europea brindou recursos económicos ao tempo que impulsou a modernización de todo o tecido produtivo e da sociedade no seu conxunto.
Como terceiro factor, referiuse ao avance educativo en todos os niveis, tamén no universitario. “Despois de décadas e séculos nos que a educación superior era un privilexio reservado a uns poucos, o acceso á universidade converteuse nunha realidade practicamente ao alcance de todas e todos", afirmou Santalices Vieira.
O feito de que a Galicia actual dispoña de tres universidades públicas e sete campus fai que a Comunidade conte coa “mocidade mellor formada de toda a nosa historia, unha feliz realidade que nos permite ollar o futuro con optimismo", aseverou o titular do Lexislativo galego.
O presidente do Parlamento amosouse orgulloso pola súa condición de antigo alumno da USC, “unha universidade cinco veces centenaria, sempre prestixiosa, outrora e agora".
Saúdos, Gabinete de Comunicación.
%20(Large).jpg)
 (Large).jpg)
 (Large) (2).jpg)
 (Large).jpg)