Acordos aprobados na reunión da Comisión 6ª, Industria, Enerxía, Comercio e Turismo, celebrada o 23 de maio de 2025

​

A Comisión 6ª, Industria, Enerxía, Comercio e Turismo, na súa sesión do 23 de maio de 2025, adoptou os seguintes acordos:

Procedementos de control e impulso

Proposicións non de lei en Comisión

Aprobación sen modificacións

- 24097 (12/PNC-002216)

Grupo Parlamentario Popular de Galicia

Rodríguez Carrera, María Felisa e 7 máis

Sobre a demanda dirixida á Xunta de Galicia co obxecto de que poña en marcha o antes posible o Plan estratéxico do comercio de Galicia 2025-2030

BOPG n.º 192f1, do 30.04.2025

Sométese a votación e resulta aprobada sen modificacións por 9 votos a favor, 0 votos en contra e 8 abstencións.

O texto aprobado é o seguinte:

"O Parlamento de Galicia insta a Xunta de Galicia a poñer en marcha, o antes posible, o Plan Estratéxico do Comercio 2025-2030 co fin de abordar os principais desafíos aos que se enfronta o sector, en coordinación coas administracións e da man do sector."

Aprobación por unanimidade con modificacións

- 6874 (12/PNC-000808)

Grupo Parlamentario do Bloque Nacionalista Galego

Golpe Acuña, José Manuel e 2 máis

Sobre as demandas que a Xunta de Galicia debe trasladar ao Goberno central no que atinxe ás diferenzas de calidade da subministración da enerxía eléctrica segundo a tipoloxía dos espazos xeográficos

BOPG n.º 52, do 23.07.2024

Sométese a votación e resulta aprobada con modificacións respecto do texto orixinal, pola unanimidade dos 17 deputados e deputadas presentes.

O texto aprobado é o seguinte:

"O Parlamento de Galicia insta ao Goberno galego a que demande do goberno de España:

-A modificación do sistema de medida da calidade do servizo do subministración de electricidade que recolla as seguintes premisas:

1. Valorar os investimentos que suporían a redución do temo mínimo para que un corte sexa considerado interrupción dos 3 minutos actuais a un valor inferior, co obxectivo de chegar ao nivel do microcorte, de xeito progresivo, na medida que o permita a tecnoloxía dispoñible.

2. Reducir o tempo mínimo para que un corte sexa considerado interrupción dos 3 minutos actuais a un valor inferior en base á valoración económica previa, de tal xeito que non supoña un incremento substancial das peaxes e recargos dos sistema eléctrico.

3. Ir diminuíndo paulatinamente as diferencias entre zonas, de tal xeito que se garanta unha subministración eléctrica de calidade en todo o territorio.

4. Establecer criterios de calidade trimestrais e anuais.

5. Deseñar sancións ás empresas distribuidoras que incumpran os criterios de calidade zonal e individual de xeito que se poidan liquidar nun prazo máximo de tres meses dende que se produzan os cortes de carácter mensual, e no primeiro trimestre do ano móbil seguinte, tomando como referencia a sinatura de contrato de acceso.

-Actualizar automaticamente as indemnizacións a indicadores económicos vixentes ou segundo o prezo medio da enerxía nas facturas de electricidade."​