​

A exposición '40 anos de Autonomía de Galicia nas caricaturas de Siro' viaxa ata Lugo

• A Sede Afundación desta cidade acolle esta exposición na que se mostran 230 dos debuxos nos que durante anos plasmou a actualidade política de Galicia

• Santalices agradece a xenerosidade de Siro López por facer unha nova doazón ao Parlamento, pasando de 1.577 caricaturas a un total de 2.850

• Esta selección dos orixinais doados exponse por terceira vez fóra das instalacións da Cámara

Santiago, 4 de setembro de 2025.- O presidente do Parlamento, Miguel Ángel Santalices Vieira, agradeceu hoxe en Lugo durante a inauguración da exposición 40 anos de Autonomía de Galicia nas caricaturas de Siro que o autor realizara unha nova doazón á Cámara galega, composta por 1.273 caricaturas, que así amplía a cifra total ata chegar ás case 3.000.

A exposición integra unha escolma dos debuxos doados polo artista e que foron publicados no xornal La Voz de Galicia case a diario durante máis de vinte anos.

Na súa intervención, o xefe do Lexislativo autonómico destacou a creatividade, ironía e retranca coa que Siro López comentaba a actualidade política converténdose nun artista multidisciplinar con estilo propio e unha ampla traxectoria no ámbito da caricatura xornalística.

Exposición

A mostra reúne unha selección de 230 viñetas nas que se fai un percorrido por diferentes etapas transcendentais da historia política galega e os seus protagonistas xunto coas páxinas do xornal no que apareceron publicadas.

A exposición quedará aberta ao público na Sede Afundación de Lugo ata o vindeiro 11 de outubro, de luns a venres en horario de 09.00 a 14.00 h e de 17.30 a 20.30 h, e os sábados de 11.00 a 14.00 h e de 17.00 a 19.00 h.

Saúdos, Gabinete de Comunicación​