Santiago, 7 de febreiro de 2013.- Logo de valorar as opinións dos distintos portavoces parlamentarios, “e desde o convencemento de que todos buscamos o mellor funcionamento da Cámara”, a presidenta do Parlamento de Galicia aplicará no vindeiro Pleno os criterios de ordenación do acceso de público á tribuna, que xa coñecen os grupos e que se axunta en documento anexo.
O Parlamento de Galicia quere facer as seguintes consideracións:
• Estes criterios non supoñen a aplicación de novas normas.
• O documento pon por escrito os criterios que xa se estaban a aplicar por acordo verbal e, polo tanto, busca transparentar as normas que aplica a Presidencia da Cámara en relación coas atribucións que lle outorga o Regulamento do Parlamento de Galicia.
• A sinatura polos invitados da información que se lles proporcione á entrada do Hemiciclo –e que se viña entregando xa desde a 4ª Lexislatura- garántelles o coñecemento das normas que rexen a orde na tribuna de convidados.
“En definitiva, trátase de que entre todos sexamos capaces de garantir o normal funcionamento da Cámara”, conclúe Pilar Rojo.
Criterios de ordenación do acceso de público as tribunas
1.- O grupo parlamentario é responsable de dar cumprida información aos seus invitados do previsto no Regulamento respecto da orde dentro do recinto parlamentario.
2.- Para o seu acceso ao salón de Plenos os invitados deberán asinar o escrito que se lles proporciona á entrada da tribuna no que constan os deberes do público previstos no Regulamento.
3.- No suposto de que o invitado non asine poderá seguir a sesión plenaria dende o espazo do grupo parlamentario.
4.- No caso de expulsión do salón de sesións por desorde nas tribunas os invitados expulsados non poderán asistir á Cámara durante o período de sesións ou tempo equivalente, sen prexuízo doutras consecuencias previstas no regulamento. So poderán acceder aos locais dos grupos parlamentarios, previa invitación polos mesmos.
5.- No caso de expulsión do salón de sesións por desorde nas tribunas, o grupo parlamentario que invitou aos expulsados deberá deixar transcorrer un pleno para poder propoñer invitados. En caso de reincidencia perderase o cupo como mínimo para un período de sesións ou tempo equivalente.
6.- Os invitados deben absterse de portar pancartas, estandartes ou emblemas de todo tipo que conteñan mensaxes que non respecten o comportamento previsto no artigo 109 do regulamento para os invitados.
7.- No caso de alteración da orde os servizos de seguridade remitirán testemuña dos feitos á Mesa para o seu traslado á autoridade xudicial.
Parlamento de Galicia
